يامرحبا بك مثل ما سلمـت وعليـك السـلام
==== عد الحروف اللي نطقت بها السـلام وقدهـا
يامرحبا بك والعيون الخـرس داخلهـا كـلام
= والكلمه اللـي تستحـي منهـا دوامـا بدهـا
قلها ولو هي كالسهم صاحبك ضاري بالسهـام
==== كم صوبت صوبه سهام وكم بصـدره صدهـا
قلها وريحني قبل تصحى بـك جـروح نيـام
==== تعبـت انومهـا لعـل النـوم يحفـظ سدهـا
اخاف لاصحيتها ترقـص لهـا بنـت الغمـام
=== لامن لمع براقهـا قـال الرعـد خـذ ردهـا
اشـوف كنـك غـارق باللهم ولا مستـهـام
=== والا تبي تعرف خفايا النفـس واللـي شدهـا
خذ عندك اللي ماتعرفه والعلـوم لهـا زمـام
=== واللي فلت منه الزمام اكثـر علومـه هدهـا
صاحبك تعجبه الجميلـه دام مبداهـا احتـرام
=== لكـن ليـا شـاف التغلـي ماطلبهـا ودهــا
قوى روابط عزته وايقض لها حرب الخصـام
==== ولا انهـزم قـدام ضحكتهـا وبـارق خدهـا
لو تكتسي حله حنـان مـن قدمهـا لا البهـام
==== مالينت قلـب قسـى ضـد الحنـان وضدهـا
الا حنان امه خضـع لـه واستلـذ الانهـزام
=== قبـل قدمهـا وانحنـى قبـل يقـبـل يـدهـا
صاحبك لامنه جفاه النـور ماهـاب الظـلام
=== اشعل قناديـل الثقـه بالنفـس واشعـل ندهـا
ساق المطيـه للوفـا وادرج يمينـه للخطـام
==== وان مال عنها شدهـا عجـل وعـد ل شدهـا
ولا رجا المنان والدنيـا حطـام فـي حطـام
====== لابو صلايـب مـدة المنـه لبـو مـن مدهـا
له شور ابلغ عند نفسه من مضاريب الحسـام
==== وله عزم اقوى من جفا بعض النفوس وصدها
لاصار شور الرجل ما يجلى عن النفس العسام
===== ياعل شلفا القوم تطعـن فيـه لآخـر حدهـا
وان كان محصول التعب ماسد حتـى للحمـام
==== في ذمتك وش فايده يمنى الفلـس مـن كدهـا
لاينشغل بالك على مثلي تـرى ربعـي كـرام
========= لكـن معـك بالله رسالـه للعـواذل ودهــا
العاذل اللي لامني مالـه علـى مثلـي مـلام
========== عليـه يبنـي لومتـه وانـا علـي اهـدهـا
وان كان مافاد الهداد الضرب في الميت حرام
========= انـا مسكـت نصابهـا خلـه يـلاوي حدهـا
اشوف كن الليل قـرب يرتخـي عنـه اللثـام
======== ونـا علومـي لاتـزال يزيـد عنـدي مدهـا
تعال ابا قول لك شـي واضـح قبـل الختـام
======= ابيك تفصل به سواليف الهـزل عـن جدهـا
والله لو اخسر مابقي بالعمر مارجـع للغـرام
======= وانا ليـا مـن قلـت كلمـه والله انـي قدهـا
