صاحبي مايضحك بالجرح غير اعذاره
وانت جرحك لا مموتني ولامحيني
ومايبكي القبر الا لامشوا زواره
لامسحت غبار آخر حفنه بكفيني
ودام ودك تدفن الي بيننا باسراره
ادفنه والا انا كيف ادفنه بيديني
يوم انا بانيه من ساسه الين جداره
وكل ذرة ملح في تركيبته تعنيني
لك علي اشغل السي دي في السياره
وابكي ابكي لين اصب القلب من جفنيني
ولك علي انسى علوم الوصل بالقطاره
ولك علي اكسر خواطر كل ربعي فيني
ولك علي اطر ذكر الخير فيك طراره
ولك علي ارضيك لو رضاك مايرضيني
صاحبي واللي يحط الطعم بالسناره
احسن انه لو يصرح فيه عينك عيني
ماني مجاوب على نظراتك المحتاره
خلها وتضيع مابين المرايه وبيني
خلها تشغل حلوق العالم الثرثاره
والا انا ماهيب تسمني ولا تغنيني
رح فمان الله وجه ابيض وطيب بشاره
لاتراعيني بعينك لين ماتخفيني
واعرف انك لو تلف الارض حاره حاره
وين ماتلقى ملامح طيب بتلاقيني
واعرف انك لو تضيق بدنيا دواره
ماتشوف لا ويدينك وسط ايديني
سلامتكم
